O obxectivo desta exposición é presentar o legado de “La Artística S.A.”, principal empresa galega na elaboración de latas para unha industria que rapidamente se afianzou na nosa terra. Este legado en forma de pedras litográficas, documentación e diversos materiais, depositado nos fondos do Museo do Pobo Galego, atesoura unha interesante información sobre a industria da conserva, o acontecer da sociedade e os seus costumes reflectidos artisticamente nos gravados que conforman a lata de conservas.

A concesión a Nicolás Appert en 1810 do premio de 12.000 francos convocado por Napoleón Bonaparte para quen descubrise un método de conservar os alimentos para subministración do seu exército marca o inicio da industria das conservas no mundo. Os recipientes de vidro usados inicialmente non tardaron en ser substituídos por botes de folla de lata. Así, o produto conservado deixaba de ser visible e comezaba a necesidade de decorar os envases.

A fabricación de conservas herméticas de peixe en Galicia se remonta a 1841. Porén, non foi ata a década de 1880 cando comezou a converterse nun verdadeiro sector industrial. A partir de 1900 Galicia confírmase como líder do sector en España e sitúase no grupo de cabeza dos países produtores no ámbito internacional.

A litografía era o procedemento empregado para trasladar a decoración, a marca e información aos envases de folla de lata. Este proceso levábase a cabo nas empresas metalgráficas, que ademais da impresión litográfica dedicábanse á fabricación dos envases. En Galicia as metalgráficas nacen estimuladas polo desenvolvemento da industria conserveira de peixe, sector co que manteñen unha relación moi estreita. Pero tamén atendían a demanda doutras industrias agroalimentarias peninsulares dedicadas ao envasado de aceites, verduras, froitas, etc., así como da industria farmacéutica e de perfumería.

A exposición comeza cunha breve introdución sobre a industria conserveira e metalgráfica en Galicia, facendo especial mención a La Artística. Continúa cunha concisa explicación do procedemento de litografado do metal e tamén da elaboración do propio envase. Finalmente, faise unha análise dende o punto de vista artístico dos diferentes deseños publicitarios empregados nos envases de lata.