ACTIVIDADES DA OFICINA DE SOCIOS E SOCIAS NO 2022

Tipo nova
Socias e socios
ACTIVIDADES DA OFICINA DE SOCIOS E SOCIAS NO 2022
Imaxe

O sábado 21 de maio de 2022 organizamos unha visita guiada á cidade de Lugo, organizada por D. Anxo Regueiro, representante de socios e socias do MPG.

Visitamos a Domus dos Mosaicos e o conxunto da Porta Miñá - Sala Porta Miñá (exposición do Lugo romano).

Visita á Domus do Mitreo acompañados por D. Felipe Arias Vilas, patrón do Museo, e D. José Ignacio Vilaseco Vázquez,  representante de socios e socias, quen nos fixo de guía durante toda a viaxe.

Visita guiada á Catedral da man de D. Clodio González Pérez, patrón do Museo.

Recepción e visita guiada ao Museo Provincial de Lugo por parte da súa Directora, Dna. Aurelia Balseiro García, e da Vicepresidenta da Deputación de Lugo, Dna. Teresa Ferreiro Tallón.

 

Pola tarde visitamos o Vello Cárcere, actualmente convertido en centro cultural, guiados polo seu persoal.

 Acompañounos o Director do MPG, D. Manuel Vilar Álvarez.

 

O 16 de xuño fixemos unha excursión á Illa de Arousa, dende onde embarcamos cunha empresa autorizada para ir á Illa de Guidoiro Areoso.

Acompañáronnos as arqueólogas Dna. Patricia Mañana, Directora da escavación, e Dna María Xosé Bóveda, Subdirectora da escavación do túmulo 4 e representante de socios e socias. Guiáronnos até os túmulos de Guidoiro e Areoso que aínda se conservan, facendo un percorrido completo da illa.

 

Tamén nos acompañou D. Xosé Penas Patiño, gran coñecedor das aves mariñas, con varias publicacións. Embarcamos de regreso por Guidoiro Pedregoso observando as aves mariñas da súa man, e pola tarde fixemos a pé pola costa un paseo para observar as aves mariñas de ribeira, nas árbores do camiño.

Para rematar tivemos unha visita guiada á Adega Don Bardo feita polo seu responsable, D. Arturo Barreiro, quen tivo o detalle de convidarnos a uns viños.

 

 

O 29 de outubro fixemos un magosto no Museo grazas á colaboración desinteresada da Asociación Cultural Rocha Forte, que nos aportou todo tipo de asistencia técnica e humana.

 

Este ano o magosto estivo especialmente dedicado a nenos e nenas, puidendo desfrutar co contacontos Anxo Moure que trouxemos especialmente para eles.

 

Participaron moitos nenos e gran cantidade de adultos resultando unha xeira moi agradable. Tódolos asistentes puideron levar como obsequio algunha das publicacións propias do Museo que puxemos á súa disposición durante a celebración do Magosto.

 

O xoves 15 de decembro presentamos no auditorio do Museo o libro “Facedores de imaxes. Fotografía e sociedade en Vigo (1870-1915)” escrito por Vítor Vaqueiro e editado por Galaxia. Contamos coa presenza do propio autor, que estivo acompañado polo Director do Museo, Don Manuel Vilar Álvarez, e por Dona Natalia Poncela López, historiadora e crítica de arte, quen presentou o acto.