ENTRADAS Á VENDA AQUÍ
AVISO: SE ALGUÉN TEN PROBLEMAS NA ADQUISICIÓN DAS ENTRADAS, POR FAVOR QUE CONTACTE CON info@vivetix.com
* Información de grupos e actividades AQUÍ
O 22, 23 e 24 de outubro celébrase a 1ª edición de Soa Bonaval, un evento organizado polo Museo do Pobo Galego, con concertos, conversas e itinerarios sonoros.
O festival pretende desmitificar os xéneros e as etiquetas, e contar con artistas que traballan sobre os sons clásicos e de raíz, o local, a cultura e a lingua propias, compoñendo músicas plenamente actuais que van desde o electrónico ao folk pasando polo pop, o rock ou o ambient.
O cartel desta primeira edición inclúe propostas como a da cantautora de Ibias (Asturias), Lorena Álvarez quen traerá a Soa Bonaval a súa “Colección de canciones sencillas”; Peña o grupo pontevedrés formado por Toño Magariños (Diola, Unicornibot), Rubén Abad (Cró!, Trilitrate) e Elena Vázquez (Trilitrate) ou Libredón, o proxecto musical do compostelán Denís Estévez, que desfragmenta e recompón pezas clásicas cunha linguaxe analóxico-dixital.
Ademais o festival estreará Exvba, unha proposta que nace da unión de Elba Fernández e Xavi Font. Os gañadores do Mestre Mateo 2020 á mellor música orixinal por "Hierro”, Elba e Xavi, deciden afastarse dos longos tempos no estudio para crear este proxecto que verá a luz na Igrexa de Bonaval, lugar para o que foi creado.
No formato de conversas con artistas, Soa Bonaval trae a un dos produtores máis aclamados da última década: o catalán Raül Refree, que neste ano meteuse de cheo na música tradicional galega da man de Luneda Producións e con quen falaremos do seu particular achegamento e traballo coas músicas populares e tradicionais peninsulares. A conversa completarase coa actuación de Tralo-Valo, o dúo da tocadora Carme da Pontragha e o zanfoneiro Ariel Ninas, que interpretarán un repertorio baseado no arquivo do antropólogo danés Gustav Henningsen.
A primeira edición do Soa Bonaval complétase co itinerario sonoro Son[em]peza. A proposta foi desenvolvida polo Departamento de Educación e Acción Cultural do Museo coa colaboración do equipo do Arquivo do Patrimonio Oral Inmaterial (APOI). Durante o festival, o itinerario será conducido polo persoal que o deseñou. Despois, e até finais de ano, poderá realizarse de maneira autónoma.
As entradas aquí: Vivetix do Museo do Pobo Galego.
O festival está organizado polo Museo do Pobo Galego, co patrocinio do Concello de Santiago, a Deputación da Coruña e a Xunta de Galicia, e conta coa colaboración do Arcebispado de Santiago.